Nagkaroon ng bilateral meeting sa pagitan ni U.S. President Donald Trump at bagong halal na Canadian Prime Minister Mark Carney sa White House nitong Martes, Mayo 6.
Sa nasabing pagpupulong, tinalakay ng dalawang lider ang mga kasalukuyang isyu sa pagitan ng Estados Unidos at Canada, partikular ang trade pressure at mga tensyong may kaugnayan sa kalakalan. Ayon sa White House press release, bukas umano ang Canada sa posibilidad ng pagtatatag ng bagong ugnayang pang-ekonomiya at seguridad kasama ang Estados Unidos.
Ito ang unang opisyal na pagpupulong ng dalawang lider mula nang maupo si Carney bilang punong ministro ng Canada. Binigyang-diin niya ang kahalagahan ng malawak at patas na kooperasyon sa ekonomiya, at pinalawig pa ang panawagan para sa mas matibay na relasyon sa seguridad lalo na sa mga isyung may pandaigdigang epekto.
Nagkasundo sina Trump at Carney na ipagpatuloy ang usapan sa mga susunod na linggo, at muling magkikita sa G7 Summit na gaganapin sa Canada mula Hunyo 15 hanggang 17. Ayon sa mga tagamasid, mahalaga ang pag-uusap na ito upang mapanatili ang kooperasyon ng dalawang bansa sa gitna ng mga pagbabago sa pandaigdigang ekonomiya at seguridad.
Ang Trump-Carney bilateral meeting ay inaasahang magiging simula ng mas bukas na dayalogo at kooperasyon sa pagitan ng dalawang pangunahing bansa sa North America.
Para sa mas maraming balita sa pandaigdigang ugnayan at pulitika, manatiling nakatutok sa GNN World News.
