Umaalma ang mga netizens sa inanunsyong taas-singil sa Netflix na magiging epektibo simula Hunyo 1, 2025. Ito ay kasunod ng pagpapatupad ng batas na nagpapataw ng 12% value-added tax (VAT) sa mga digital services ng mga foreign companies na nag-ooperate sa Pilipinas.
Ayon sa abiso, tataas ang buwanang bayad sa lahat ng Netflix plans:
- Mula ₱149 magiging ₱169 para sa Mobile Plan
- Mula ₱249 magiging ₱279 para sa Basic Plan
- Mula ₱399 magiging ₱449 para sa Standard Plan
- Mula ₱549 magiging ₱619 para sa Premium Plan
Bagamat ito ay bunsod ng bagong regulasyon sa buwis para sa digital platforms, hindi naging maganda ang pagtanggap ng maraming Pilipino. Marami ang nagpahayag ng pagkadismaya sa social media, lalo’t marami na ang naaapektuhan ng mataas na gastusin sa araw-araw.
Ayon sa batas, ang 12% VAT ay ipapataw sa mga online services tulad ng video streaming, music, online games, at iba pang digital subscriptions na hindi rehistrado bilang lokal na kumpanya.
Samantala, nilinaw ng Netflix na ito ay alinsunod sa batas, at ang dagdag na bayarin ay makikita na sa billing cycle ng mga subscribers sa susunod na buwan.
Umapela naman ang ilang consumer groups na sana’y magkaroon ng komprehensibong konsultasyon at alternatibong solusyon para hindi mabigatan ang mga mamimili sa digital consumption.
Sa harap ng taas-singil sa Netflix, hinihikayat ng ilang netizens ang paggamit ng family sharing at mas murang alternatibong streaming platforms bilang paraan upang makatipid.
Patuloy na babantayan ng GNN ang epekto ng bagong buwis na ito sa iba pang streaming at digital service providers sa bansa.
