Bago tumulak patungong Estados Unidos, inihayag ni Department of Trade and Industry (DTI) Secretary Cristina Aldeguer-Roque ang plano ng pamahalaan na umapela sa U.S. para sa pagbaba ng 17% reciprocal tariff sa Philippine export tungo sa zero rate.
Ayon kay Secretary Roque, layunin ng pamahalaan na palakasin ang kalakalan sa pagitan ng Pilipinas at Amerika, lalo na’t nag-anunsyo ang Estados Unidos noong Abril 9 ng 90-araw na freeze sa exchange of tariffs, kung saan ibinaba rin ng U.S. sa 10% ang taripa sa karamihan ng mga bansa, kabilang ang Pilipinas.
Ang temporary reduction ay pagkakataon para sa mga trade partners na makipagnegosasyon at i-reassess ang trade relations. Kaya naman sa nakatakdang pag-uusap, inilahad ng DTI ang mga oportunidad at hamon na hatid ng kasalukuyang reciprocal tariff arrangement, partikular sa eksportasyon ng mga produktong Pilipino sa merkado ng U.S.
Naniniwala si Secretary Roque na maayos ang naging pag-uusap sa pagitan ng dalawang panig, at umaasa siyang magiging bukas ang Amerika sa panukalang pagbababa ng taripa upang mas mapalakas ang competitiveness ng Philippine exports.
Ang reciprocal tariff sa export ay isang sensitibong isyu sa kalakalan, at ang inaasahang pagtugon ng U.S. ay makaaapekto sa mga pangunahing industriya ng bansa tulad ng electronics, garments, at agrikultura.
Patuloy ang pagsusumikap ng DTI na itaguyod ang kapakanan ng exporters at negosyanteng Pilipino, lalo na sa pandaigdigang merkado kung saan matindi ang kompetisyon. Hinihikayat ang publiko na suportahan ang mga produktong lokal at makiisa sa adbokasiyang palaguin ang ekonomiya ng bansa sa pamamagitan ng patas at malawak na ugnayang pangkalakalan.
