Naglabas ng abiso ang Commission on Elections (COMELEC) kaugnay ng pagpapaliban ng nakatakdang voter registration para sa Barangay at Sangguniang Kabataan Elections. Imbes na simulan sa Hulyo 2025, ito ay ililipat sa huling bahagi ng Oktubre ngayong taon at tatagal hanggang Hulyo 2026.
Ayon sa COMELEC, ang desisyon ng pagpapaliban ng voter registration ay upang maiwasan ang kalituhan sa hanay ng mga botante, lalo na sa mga lalahok sa Bangsamoro Parliamentary Elections (BPE) na itinakda sa Oktubre 13, 2025.
Pahayag ng komisyon, mahalagang maging malinaw ang paghahanda ng mga botante, lalo na sa mga lugar na kasali sa BPE, upang matiyak na walang aberyang mangyayari sa panahon ng eleksyon. Ang hakbang na ito ay bahagi ng kanilang mas pinaigting na kampanya para sa maayos, ligtas, at organisadong halalan sa bansa.
Dagdag pa ng COMELEC, ang muling pagbubukas ng voter registration sa Oktubre ay isasagawa sa buong bansa, at muling maglalabas ng panibagong iskedyul para sa mga barangay at lungsod. Tiniyak ng ahensya na ipapaabot ito sa publiko sa pamamagitan ng malawakang impormasyon at koordinasyon sa mga lokal na pamahalaan.
Inaasahan ng COMELEC na ang pagpapaliban ng voter registration ay makatutulong upang bigyang-priyoridad ang Bangsamoro Parliamentary Elections ngayong taon, habang pinaghahandaan na rin ang mas maayos na Barangay at SK Elections sa susunod na taon.
