Ilang mga bagong batas ang nilagdaan ni Pangulong Ferdinand Marcos Jr. na layong tugunan ang mga pangangailangang medikal at palakasin ang kabuuang pagpapalakas ng healthcare system sa bansa.
Kabilang sa mga pangunahing probisyon ay ang pagtatatag ng mga bagong ospital tulad ng Calamba City General Hospital sa Laguna at ang Zamboanga del Sur First District Hospital. Layunin ng mga batas na ito na mas mailapit ang serbisyong medikal sa mga residente ng mga lugar na matagal nang kulang sa pasilidad pangkalusugan.
Bahagi rin ng pagpapalakas ng healthcare system ang pagsasabatas ng mga panukalang magpapataas ng bed capacity sa ilang mga ospital sa bansa. Ilan sa mga ospital na mapapalawak ang kapasidad ay ang Amai Pakpak Medical Center sa Marawi City, San Pedro District Hospital sa Laguna, Amang Rodriguez Memorial Medical Center sa Marikina, at ang Region 1 Medical Center sa Dagupan, Pangasinan.
Ayon sa Malacañang, ang mga panukalang ito ay hindi lamang ukol sa pisikal na pagpapalawak kundi sinusuportahan din ng nakalaang pondo para matiyak ang maayos na pagpapatupad ng mga proyekto. Ang pondong ito ay gagamitin para sa imprastruktura, kagamitan, at karagdagang medical personnel upang matiyak ang kalidad ng serbisyo.
Ang hakbang na ito ay bahagi ng mas malawak na layunin ng administrasyon para sa pagpapalakas ng healthcare system at pagtugon sa kakulangan ng access sa dekalidad na serbisyong pangkalusugan, lalo na sa mga probinsya.
Sa kabuuan, inaasahang ang mga bagong batas na ito ay magbubukas ng mas maraming oportunidad sa mga Pilipino na makakuha ng sapat, mabilis, at abot-kayang serbisyong medikal sa kanilang mga komunidad.
