Marso 25, 2025 | 7:30 AM GMT+08:00
Siniguro ng Manila Public Information Office (PIO) ang pagtuligsa nito sa paglipana ng mga fake news ngayong nalalapit na ang eleksyon. Ayon kay Manila PIO Chief Atty. Princess Abante, kasama umano dito ang pagbibigay kaalaman sa publiko ng tamang paraan ng pag-verify ng mga totoong impormasyon.
Nakikipag-ugnayan din umano ang pamunuan ng Manila PIO sa mga lehitimong mainstream media upang linawin ang mga insidente ng fake news na maaaring makapagpabago sa pananaw ng publiko, lalo na ngayong panahon ng kampanya. Ang mga hakbang na ito ay naglalayong tiyakin na tanging ang tama at wasto lamang na impormasyon ang ipinapakalat sa mamamayan.
Ayon kay Atty. Abante, ang mga maling impormasyon na ipinakalat ay itinuturing na ilegal, kaya’t ang mga ito ay agad na idinidiretso sa City Legal Office upang masusing imbestigahan at aksyonan. Ang layunin ng Manila PIO ay maprotektahan ang mga botante laban sa maling impormasyon na posibleng magdulot ng kalituhan at hindi pagkakaunawaan.
Sa mga darating na linggo, inaasahan ng Manila PIO na patuloy na mapapalakas ang kampanya laban sa fake news upang matiyak na ang lahat ng impormasyon na tatanggapin ng publiko ay tapat, tama, at makatarungan, partikular na sa halalan. Sa pamamagitan ng kolaborasyon sa mga media at iba pang sektor, layon ng Manila PIO na magbigay daan sa isang malinis at makatarungang eleksyon.
