Marso 6, 2025 | 6:40 AM GMT+08:00
Sa unang pagkakataon ngayong taon, isinailalim ng National Grid Corporation of the Philippines (NGCP) ang Luzon Grid sa yellow alert status dahil sa mataas na demand sa kuryente at sapilitang pagkawala ng ilang power plants dulot ng matinding init ng panahon.
Ayon sa NGCP, ang yellow alert ay ipinatupad mula alas-5 ng hapon hanggang alas-7 ng gabi noong Miyerkules, matapos bumaba ang reserbang suplay ng kuryente sa grid. Gayunpaman, bandang 7:49 PM ng parehong araw, inalis na rin ang alerto matapos bumalik sa normal ang suplay.
Kasunod ng deklarasyong ito, binabantayan na rin ng Meralco ang sitwasyon upang matiyak na sapat ang enerhiya para sa mga konsyumer at maiwasan ang posibleng brownout, lalo na’t inaasahang tataas pa ang demand habang lumalakas ang init ng panahon sa mga susunod na linggo.
Samantala, nananatili namang normal ang suplay ng kuryente sa Visayas at Mindanao, ayon sa NGCP.
