Isang Low Pressure Area (LPA) ang namataan sa karagatan ng Corcuera, Romblon, ayon sa ulat ng PAGASA. Bagamat nasa bahagi ito ng Romblon, inaasahang makaaapekto rin ang lagay ng panahon sa ilang lugar sa Luzon.
Kabilang sa mga lugar na makararanas ng pag-ulan at maulap na kalangitan ay ang Metro Manila, CALABARZON, MIMAROPA, Bicol Region, Zambales, Bataan, Pampanga, at Bulacan. Ang mga pag-ulan ay maaaring magdulot ng mga pagbaha sa mabababang lugar at pagguho ng lupa sa mga bulubunduking rehiyon.
Samantala, ang easterlies o mainit na hangin mula sa silangan naman ang magdadala ng bahagyang sama ng panahon sa mga lalawigan ng Isabela, Quirino, Aurora, gayundin sa buong Visayas at Mindanao. Asahan ang mga kalat-kalat na pag-ulan at pagkidlat-pagkulog lalo na sa hapon o gabi.
Pinapayuhan ang publiko na maging alerto sa mga posibleng epekto ng sama ng panahon, at patuloy na makinig sa mga abiso ng PAGASA para sa mga susunod na update.
