Nagtipon ang mga opisyal mula sa Pilipinas at Cambodia sa isang regional dialogue and knowledge exchange na tumutok sa pagpapalalim ng kooperasyon laban sa human trafficking at iba pang transnasyunal na krimen. Pinangunahan ang delegasyon mula sa Cambodia ni Secretary of State Hon. Chou Bun Eng, habang si Philippine Ambassador to Cambodia Hon. Flerida Ann Camille P. Mayo ang nanguna para sa panig ng Pilipinas.
Kasama sa mga opisyal na dumalo sina Department of Social Welfare and Development (DSWD) Secretary Rex Gatchalian, Department of Justice Undersecretary Nicholas Ty, at Presidential Anti-Organized Crime Commission (PAOCC) Deputy Executive Director Genesis Tolejao.
Bilang bahagi ng pagtitipon, binisita ng mga opisyal ang Nasdake Building sa Pasay City—dating kilalang POGO at scam hub. Sa kasalukuyan, ito na ay opisyal na pasilidad ng pamahalaan na nagsisilbing tahanan ng mga programa ng DSWD tulad ng “Walang Gutom Kitchen” at “Pag-abot,” na tumutulong sa mga kababayan nating nangangailangan.
Sa ikalimang palapag ng gusali matatagpuan ang custodial facility para sa mga banyagang sangkot sa mga kaso ng ilegal na online gaming at human trafficking. Ang operasyon ng nasabing pasilidad ay isinasagawa sa pakikipagtulungan ng Bureau of Immigration (BI), Bureau of Jail Management and Penology (BJMP), at Philippine National Police (PNP).
Layon ng dayalogo at pagbisita na mas mapalalim pa ang ugnayan ng Pilipinas at Cambodia sa pagtugon sa mga krimeng sumasaklaw sa higit sa isang bansa—partikular na ang human trafficking, na kadalasang konektado rin sa cybercrimes at iligal na hanapbuhay.
Ang pagkakaroon ng ganitong inisyatiba ay patunay ng pagkilala sa kahalagahan ng internasyonal na pakikipagtulungan. Sa patuloy na banta ng human trafficking, nananatiling mahalaga ang pagpapalitan ng kaalaman, estratehiya, at suporta sa pagitan ng mga bansang naapektuhan.
Ang pakikipagtulungan laban sa human trafficking ay hindi lang laban ng isang bansa, kundi laban ng buong rehiyon. Sa pagkakaisang ito, mas epektibong masusugpo ang mga sindikatong patuloy na umaabuso sa kahinaan ng mga tao.
