Balik pre-pandemic levels na ang inflation rate ng bansa, na naitala sa 1.4% nitong Abril 2025, ayon sa pinakabagong ulat mula sa Philippine Statistics Authority (PSA).
Sa isang press briefing, inilahad ni PSA Undersecretary at National Statistician Claire Dennis Mapa na ang pagbaba ng inflation rate April 2025 ay bunga ng mas mabagal na pagtaas sa presyo ng mga pangunahing bilihin, partikular na sa pagkain at non-alcoholic beverages.
Batay sa datos ng PSA, bumaba mula 2.2% noong Marso tungo sa 0.9% nitong Abril ang inflation rate para sa pagkain at inumin, na malaki ang naging ambag sa kabuuang pagbaba ng inflation sa bansa.
Sa kabuuan, tinatayang nasa 2.0% ang national average inflation mula Enero hanggang Abril 2025, na pasok sa target range ng pamahalaan na 2% hanggang 4%.
Ayon kay Mapa, positibong senyales ito para sa ekonomiya ng bansa, dahil nakatutulong ang mababang inflation sa mas matatag na purchasing power ng mga mamamayan. Dagdag pa niya, patuloy na mino-monitor ng PSA ang galaw ng presyo ng bilihin upang mapanatili ang transparency at maagang pagbibigay babala sa publiko kung kinakailangan.
Inaasahan ng economic managers ng gobyerno na magpapatuloy ang ganitong trend, lalo na’t may mga isinagawang hakbang upang mapanatili ang sapat na suplay ng pagkain at iba pang essential goods sa merkado.
Patuloy na pinapaalalahanan ang publiko na manatiling mapagmatyag sa presyo ng bilihin, habang hinihikayat ang mga ahensya ng gobyerno na palakasin pa ang mga polisiya sa price stabilization at food security.
Para sa mas maraming updates tungkol sa kalagayan ng ekonomiya ng bansa, manatiling nakatutok sa GNN.
