Marso 10, 2025 | 6:40 AM GMT+08:00
Sinabi ni Senate President Chiz Escudero na hindi maaaring pabilisin ang impeachment process dahil nasa recess pa ang Senado. Bagamat sang-ayon si former Senator Sonny Trillanes sa legalidad ng pahayag na ito, tinutulan niya ang pagkaantala ng proseso.
Ayon kay Trillanes, walang probisyon sa Konstitusyon na nagsasaad na dapat itigil ang impeachment hearings kahit recess ang Senado. Iginiit niyang noong impeachment trial ni ex-Chief Justice Renato Corona, agad itong isinagawa matapos isumite ng Kongreso.
“Kung gusto nila, may paraan. Pero tila may ibang dahilan kung bakit hindi ito itinutuloy,” ani Trillanes.
Dagdag niya, hindi siya umaasang uusad ang impeachment hearing, dahil tila walang insentibo ang mayorya sa Senado para ituloy ito.
Samantala, kasalukuyang kandidato si Trillanes bilang alkalde ng Caloocan matapos ang ilang taong paninilbihan sa Senado.
