Isang makasaysayang hakbang ang inanunsiyo ng Korte Suprema matapos nitong makumpleto ang draft ng panuntunan para sa paggamit ng Filipino Sign Language (FSL) sa mga paglilitis sa hukuman.
Layon ng panukalang ito na gawing mas accessible ang court proceedings sa mga miyembro ng deaf community, bilang bahagi ng patuloy na kampanya para sa inclusive at makataong hustisya sa bansa.
Sa ilalim ng draft, kinakailangan nang magkaroon ng qualified FSL interpreters sa anumang paglilitis kung saan kasangkot ang isang hearing impaired na indibidwal. Tinitiyak ng panuntunang ito na magkakaroon ng malinaw at epektibong komunikasyon sa pagitan ng deaf person at ng mga hukom, abogado, at iba pang mga kasangkot sa kaso.
Kapag naaprubahan, magiging bahagi na ito ng opisyal na proseso sa hudikatura — isang konkretong hakbang upang masigurong pantay ang karapatan ng bawat Pilipino sa hustisya, anuman ang kanilang kapansanan.
Ang paggamit ng Filipino Sign Language sa hukom ay inaasahang magbubukas ng mas maraming oportunidad para sa pagkakapantay-pantay at makataong pakikitungo sa sektor ng batas.
