Pormal nang inanunsyo ng Metropolitan Manila Development Authority (MMDA) ang pansamantalang pagkansela ng dry run ng EDSA odd-even scheme para sa mga motorista. Ito ay kasunod ng direktiba ni Pangulong Ferdinand Marcos Jr. na itigil muna ang nakatakdang EDSA Rebuild Project.
Ayon kay Pangulong Marcos, ang hakbang ay para bigyang-daan ang masusing pag-aaral ng proyekto upang makahanap ng mas epektibong paraan sa pagpapatupad nito—nang hindi naaapektuhan ang araw-araw na pag-commute ng publiko.
Binigyang-diin naman ni MMDA Chairman Atty. Romando Don Artes na ang EDSA odd-even scheme suspension ay isang pagkakataon upang mapag-aralan muli ang sistema. Layunin ng kanilang traffic management plan na maibsan ang inaasahang matinding trapiko sa loob ng dalawang taong rehabilitasyon ng EDSA.
Ang EDSA odd-even scheme ay bahagi lamang ng mas malawak na plano upang ma-decongest ang isa sa pinaka-abalang kalsada sa Metro Manila. Sa kabila ng pagkansela ng bagong scheme, ipinagpatuloy pa rin ng MMDA ang kasalukuyang number coding policy.
Samantala, wala pang tiyak na petsa kung kailan muling ipagpapatuloy ang EDSA Rebuild Project, ayon sa pangulo.
