Inilunsad ng Department of Health (DOH) ang Philippine Multisectoral Nutrition Project Information System na nakatuon sa lumalalang problema ng brain stunting sa bata sa Pilipinas.
Ayon kay DOH Secretary Teodoro Herbosa, isa sa bawat tatlong bata sa bansa ay apektado ng brain stunting. Ito ay kondisyon kung saan naaantala ang pag-unlad ng utak ng bata dahil sa kakulangan sa nutrisyon, lalo na sa unang yugto ng kanilang buhay.
Ang proyekto ay bahagi ng mas malawak na kampanya ng gobyerno upang mapabuti ang kalusugan ng mga bata sa kanilang unang 1,000 araw—isang kritikal na panahon para sa physical at mental development.
Sa pamamagitan ng digital platform na inilunsad, mas magiging madali para sa mga lokal na pamahalaan at health workers na tukuyin ang mga batang malnourished at nangangailangan ng agarang tulong. Layunin ng systemang ito na ma-streamline ang mga nutrition program sa mga komunidad, mas mapabilis ang pagbibigay ng tulong, at mas maging epektibo ang monitoring ng mga kaso ng chronic undernutrition.
Binanggit din ni Secretary Herbosa na sa tulong ng makabagong teknolohiya, mas matutukoy agad kung saan matatagpuan ang mga lugar na may mataas na insidente ng brain stunting. Dahil dito, mas maaaksyunan ang problema bago pa ito lumala.
Dagdag pa ng DOH, hindi lang ito simpleng feeding program. Kabilang sa proyekto ang edukasyon sa nutrisyon para sa mga magulang, tamang child care practices, at pagsasanay ng mga health worker upang maging mas mahusay sa pagtugon sa nutritional needs ng mga bata.
Ang paglaban sa brain stunting sa bata ay hindi lamang usapin ng kalusugan kundi isang pambansang isyu. Kapag nabigong tugunan ang malnutrisyon, maaapektuhan hindi lang ang kakayahan ng mga bata na matuto kundi pati na rin ang kanilang produktibong kinabukasan.
Sa panibagong sistemang ito, umaasa ang DOH na magiging mas organisado, mabilis, at malawak ang tugon ng pamahalaan sa isa sa pinakamatinding suliraning kinahaharap ng mga bata sa bansa.
