Hinihikayat ng National Food Authority (NFA) ang mga magsasaka na maglaan ng dagdag na oras at pagsisikap sa pagpapatuyo ng palay upang mapataas ang kanilang kita.
Ayon kay NFA Administrator Larry Lacson, bagama’t may karagdagang gastos na ₱1 kada kilo sa pagpapatuyo, maaaring tumaas naman ng ₱4 kada kilo ang kita ng mga magsasaka. Halimbawa, ang isang magsasakang may 5 toneladang ani kada ektarya ay maaaring magkaroon ng ₱20,000 dagdag na kita kung maayos na matutuyo ang kanilang palay bago ito ibenta.
Kasabay nito, itinaas ng NFA ang kanilang buying price sa ₱18 kada kilo para sa sariwang palay at ₱24 kada kilo para sa malinis at tuyong palay. Samantala, kasalukuyang binibili ng mga rice millers ang tuyong palay sa ₱20-₱22 kada kilo, habang ang basang palay naman ay ibinibenta nang mas mababa ng ₱5 kada kilo.
Ang hakbang na ito ay bahagi ng pagsisikap ng NFA na makabili ng 880,000 metriko tonelada ng palay ngayong taon bilang pagtugon sa bagong rice buffer stock requirement. Upang suportahan ito, inilaan ang kabuuang ₱14 bilyong pondo, kabilang ang ₱5 bilyong natira mula noong nakaraang taon.
Bukod dito, pinalalakas ng NFA ang kanilang rice milling operations, pinapalawak ang kapasidad ng mga bodega, at bumibili ng bagong mga trak upang mapabuti ang procurement efforts para sa palay.
