Maghahain ng kaso ng deportation ang Bureau of Immigration (BI) laban sa siyam na dayuhang naaresto kamakailan sa Mactan-Cebu International Airport. Ang insidente ay nauugnay sa tangkang pagpasok ng higit ₱440 milyon na hindi idineklarang salapi, na nadiskubre ng mga miyembro ng PNP Aviation Security Group (AVSEGROUP)
Ayon kay BI Commissioner Joel Anthony Viado, ang mga banyagang nahuli ay mahaharap hindi lamang sa kasong kriminal at paglabag sa Anti-Money Laundering Act (AMLA), kundi pati na rin sa kasong deportation sa Mactan Airport.
Itinuturing na “undesirable aliens” ang grupo dahil sa banta umano sa pambansang seguridad ng bansa.
Binubuo ang grupo ng pitong Chinese nationals, isang Indonesian, at isang Kazakhstani.
Kasunod ng paglilitis sa kanilang mga kasong kriminal, ay ide-deport ang mga ito at ilalagay sa immigration blacklist upang hindi na muling makapasok sa Pilipinas.
Patuloy ang koordinasyon ng BI sa PNP para sa masusing beripikasyon ng mga rekord at dokumento ng mga dayuhan. Ayon sa ahensya, ang hakbang na ito ay bahagi ng kanilang pinalakas na kampanya laban sa mga aktibidad na maaaring makasama sa interes ng bansa, gaya ng pagpasok ng malaking halaga ng salapi na hindi idinedeklara.
Dagdag ng BI, ang kaso ng deportation sa Mactan Airport ay isang paalala na seryosong pinatutupad ng pamahalaan ang mga batas hinggil sa pagpasok ng dayuhang sangkot sa mga kahina-hinalang gawain.
Pinatitibay nito ang layunin ng Bureau of Immigration na protektahan ang integridad ng ating mga paliparan at ang seguridad ng buong bansa.
