Pinangunahan ni Department of National Defense (DND) Secretary Gilberto C. Teodoro Jr. ang isang mahalagang pagpupulong kasama ang mga pangunahing opisyal ng sektor ng ekonomiya upang talakayin ang posibleng mga estratehiya sa pagpopondo para sa AFP Modernization Program at Self-Reliant Defense Posture Program (SRDP).
Layunin ng pagpupulong na matiyak ang sapat at tuloy-tuloy na pondo para sa pagpapalakas ng kakayahan at modernisasyon ng Armed Forces of the Philippines (AFP), alinsunod sa itinatadhana ng Republic Act No. 12024.
Ang AFP Modernization Program ay nakatuon sa pagbili ng makabagong kagamitan at teknolohiya upang mapanatili ang kahandaan ng bansa sa harap ng mga panloob at panlabas na banta. Samantala, ang SRDP ay nagbibigay-diin sa lokal na produksyon ng defense equipment bilang bahagi ng self-reliance strategy ng bansa.
Ayon kay Secretary Teodoro, ang pagsasanib ng mga sektor ng depensa at ekonomiya ay mahalaga upang mapanatili ang pambansang seguridad at suporta sa lokal na industriya. Sinusuportahan ng administrasyong Marcos ang layuning ito bilang bahagi ng pangmatagalang estratehiya para sa isang matatag na Pilipinas.
Patuloy na magsasagawa ng koordinasyon ang DND, economic managers, at iba pang kaugnay na ahensya upang maisakatuparan ang matibay, moderno, at self-reliant na sandatahang lakas para sa bansa.
