Magandang balita para sa ating mga kababayan! Isang Overseas Filipino Worker (OFW) mula sa Butuan, Mindanao ang ligtas nang nakabalik ng bansa matapos mailigtas mula sa hatol na kamatayan o bitay sa Saudi Arabia.
Ang naturang OFW ay nakulong sa Riyadh General Jail mula pa noong 2024 dahil sa kasong may kinalaman sa ilegal na droga. Sa tulong ng pamahalaan at mga kinauukulang ahensya, matagumpay siyang napalaya at naka-repatriate pabalik sa Pilipinas.
Bilang bahagi ng reintegration program, tatanggap ang OFW ng tulong pinansyal at livelihood support upang makapagsimula muli ng bagong buhay dito sa bansa.
Sa kabila ng tagumpay na ito, nananatiling nasa panganib ang maraming OFW. Sa pinakahuling tala, tinatayang may halos 60 Pilipino sa death row sa iba’t ibang bansa, karamihan ay sa Malaysia at Saudi Arabia, at kadalasang sangkot sa mga kasong may kaugnayan sa droga.
Patuloy ang panawagan ng gobyerno at mga NGO para sa mas mahigpit na proteksyon at legal na tulong sa mga OFW upang maiwasan ang ganitong sitwasyon sa hinaharap.
