Nag-viral kamakailan ang isang video ng girian ng pulis at rider sa kalsada ng Sta. Ana na naganap noong araw ng halalan. Sa nasabing video, makikitang bumaba sa kanyang motorsiklo ang isang lalaking naka-hoody at tila galit na inalog ang helmet ng isang rider. Mapapansin ding may hawak itong baril sa kabila ng ipinatutupad na gun ban.
Ang tensyonadong eksena ay agad napansin ng mga netizen, lalo pa’t makikita sa sumunod na bahagi ng video ang pagdating ng isang unipormadong pulis na pinosasan ang rider—ang biktima umano ng harassment ng lalaking armado.
Ayon kay Philippine National Police Chief Gen. Rommel Marbil, iniimbestigahan na ng PNP Integrity Monitoring and Enforcement Group ang naturang insidente. Aniya, hindi palalampasin ng PNP ang mga kasong may kaugnayan sa abuso ng kapangyarihan.
Batay sa paunang ulat, ang nasabing pulis ay nakatalaga sa isang polling center at kasalukuyang nasa covert security operations nang mangyari ang girian ng pulis at rider. Dahil dito, inilipat agad siya sa holding section at isinuko ang kanyang mga issued firearms.
Sinampahan na rin siya ng kasong grave misconduct at conduct unbecoming of a police officer habang hinihintay ang resulta ng administrative proceedings. Binigyang-diin ni Gen. Marbil na ang paggamit ng kapangyarihan upang manakot o magpakita ng dahas ay hindi kailanman katanggap-tanggap.
Dagdag pa niya, kailangang pairalin ng lahat ng motorista ang disiplina sa kalsada, lalo na sa tensyonadong mga sitwasyon. Paalala rin ng PNP sa kanilang hanay na manatiling kalmado at maging huwaran ng propesyonalismo at serbisyong publiko.
Sa huli, hinikayat ng PNP ang publiko na ireport ang anumang uri ng pang-aabuso upang agad itong matugunan at mapanagot ang sinumang lalabag sa batas. Ang girian ng pulis at rider ay patunay na kailangang patuloy na paigtingin ang disiplina sa lansangan, lalo na sa gitna ng halalan.
