Nagsimula na ngayong araw ang conclave para sa papal election 2025, kung saan 133 kardinal mula sa iba’t ibang panig ng mundo ang lumahok upang bumoto para sa susunod na Santo Papa.
Ang halalan ay ginaganap sa loob ng Sistine Chapel sa Vatican, isang sagradong lugar kung saan isinasagawa ang lihim at pormal na pagboto. Upang manalo, kinakailangang makakuha ng 2/3 o 89 na boto mula sa mga botanteng kardinal ang isang kandidato.
Bilang bahagi ng tradisyon, inilagay na ang chimney sa bubong ng Sistine Chapel. Sa oras na magkaroon ng matagumpay na halalan, maglalabas ito ng puting usok—hudyat sa buong mundo na may bago nang Santo Papa.
Samantala, nakahanda na rin ang “Room of Tears”, isang maliit na silid malapit sa chapel kung saan unang dinadala ang bagong halal na Papa upang magsuot ng kanyang puting kasuotang pampapa. Tinatawag itong “Room of Tears” dahil dito karaniwang umaagos ang emosyon ng bagong lider ng Simbahang Katolika—luha ng pasasalamat, takot, o pananagutan sa bagong tungkulin.
Ang papal election ngayong taon ay inaabangan hindi lamang ng mga Katoliko kundi ng buong mundo, lalo na sa gitna ng mga isyung moral, panlipunan, at pandaigdigang krisis. Ang magiging resulta ng papal election 2025 ay may malaking epekto sa direksyong tatahakin ng Simbahan sa mga susunod na taon.
Para sa mga susunod na updates sa Vatican at sa halalan ng Santo Papa, manatiling nakatutok sa GNN News.
