Hinimok ni Senator Win Gatchalian ang Department of Energy (DOE) at Energy Regulatory Commission (ERC) na tiyakin ang tuloy-tuloy na suplay ng kuryente sa halalan sa darating na Mayo 12.
Ayon sa senador, ang posibleng power interruption ay hindi lamang magdudulot ng abala sa mga botante, kundi maaari ring makaapekto sa integridad at kredibilidad ng eleksyon. Iginiit ni Gatchalian na dapat nang maagang planuhin at ihanda ang mga hakbang upang maiwasan ang anumang brownout sa araw ng halalan.
Binigyang-diin ng senador na mahalagang walang unscheduled plant maintenance sa petsang iyon, at dapat nakaantabay ang mga power providers upang agad matugunan ang anumang problema sa suplay ng kuryente.
Dagdag pa niya, ang malinis at mapagkakatiwalaang halalan ay hindi lamang nakasalalay sa sistema ng pagboto, kundi pati na rin sa maayos na operasyon ng mga kagamitan na nangangailangan ng elektrisidad gaya ng vote counting machines at iba pang support systems.
Hinimok din ni Gatchalian ang DOE at ERC na maglabas ng malinaw na contingency plan upang masiguro ang supply sa lahat ng voting centers sa buong bansa. Ayon sa kanya, dapat ipabatid ito sa publiko upang magkaroon ng kumpiyansa ang mga botante sa araw ng halalan.
Ang pagkakaroon ng sapat na suplay ng kuryente sa halalan ay isang mahalagang aspeto ng pambansang seguridad, lalo na sa panahong kritikal ang bawat boto. Inaasahan ng publiko ang agarang aksyon mula sa mga kinauukulang ahensya upang matiyak ang isang mapayapa, ligtas, at maayos na halalan.
