49 Dayuhan Arestado sa Illegal POGO Scam sa Pasay
Marso 13, 2025 | 8:00 AM GMT+08:00
Natimbog ng Bureau of Immigration (BI) at National Bureau of Investigation (NBI) ang 49 na dayuhan na iligal na nagtatrabaho sa isang fraudulent POGO hub sa Macapagal Avenue, Pasay City.
Ayon sa BI, ang operasyon ay bahagi ng kanilang joint verification efforts matapos makatanggap ng impormasyon na ang naturang kumpanya ay ginagamit bilang front ng cyber-enabled fraud na target ang mga biktima sa loob at labas ng bansa.
Mga Dayuhang May Derogatory Records
Bukod sa kawalan ng tamang visa, dalawang inarestong dayuhan ang may derogatory records:
- 29-anyos na Bangladeshi na kasama sa watchlist order dahil sa illegal recruitment
- 25-anyos na Pakistani na nasa alert list order dahil sa hinihinalang financial fraud
Ang lahat ng naarestong indibidwal ay sasailalim sa deportation proceedings at blacklisting upang hindi na muling makapasok sa bansa.
BI: Pinalakas na Kampanya Kontra Illegal POGO
Ayon kay Immigration Commissioner Joel Anthony Viado, ang matagumpay na operasyon ay bahagi ng mas pinaigting na kampanya ng pamahalaan laban sa illegal na POGO operations at cybercrime, na sumusunod sa direktiba ni Pangulong Ferdinand Marcos Jr.
Matatandaang inumpisahan ng administrasyong Marcos ang pagsugpo sa mga illegal POGO operations matapos ang kanyang State of the Nation Address (SONA) noong nakaraang taon.
